BEJN TNEJN

/għal dejjem/

Freddie Portelli jkanta fl-isfond.

 U nixtieq infissirlek kemm nobgħod il-kliem kultant.

Iżda-bla-ma-rrid m’għadha tfisser xejn –

lanqas biss aħna rwieħ kuntenti, lanqas biss.

Ma naħmilx li qed tkellimni ma tgħidlix.

Ma nniżżilx kemm jien nibqa’ dejjem jien.

Did-daħka bejn iva u le kollha mbikkma fik,

bik sejjer, bija llum – u kollox jibqa’ ħoss ħossni.

Qed narak sejjer bogħod u nħallik tkompli tmur.

Imma nixtieq infissirlek kemm nobgħod il-kliem, kultant.

Kemm narak tixtieq tinsa u tiggranfa mal-friex għadu biex.

Kemm-il lożor dawwart ċfuf forom mod ieħor –

il-qalziet imdendel mal-ħajt ilu hemm qabli,

id-drappijiet mitnija ħażin waslu għal ħasla,

iż-żarbun xahrejn u nofs spraġġjat kontra,

il-qomos għaddejthom biex tibqa’ ftit iktar,

il-ħāxja ħajt imżarrat u se jkolli nasal jista’ jkun.

Is-sodda saret il-ħin tal-bieraħ –

Nixtieq nipprova infissirlek kemm nobgħod dal-kliem

fasla tmiem tirtogħod quddiemna tkun xi tkun.

Xi trid tgħid biha kull darba qatt bil-mod

tirfes l-ilsien li tiekol bih u tomgħod minnu.

Ikolli ngħidlek li issa tmiem l-aħħar darba –

mhux iktar tiegħi nħoss għalik u għalija mhux 

iktar tiegħek taqta’ fejn ma joħroġx demm mhux 

iktar tagħna tistenna li tisma’ l-biki jsir daħq. 

Meta għedtli sodda, fhimtek soda.

Meta għedtli prova, fhimtek povra.

Meta għedtli qalbi, fhimtek qabli.

Nixtieq infissirlek kemm nobgħod il-kliem –

l-iktar inħobbok.

/i cried for you on the kitchen floor/

Dis-siegħa qed tonqos bil-minuti. Dan

il-“Lejl ma’ Amy Winehouse” tixxengel

xaqliba lemin u xellug. Jien nixtieq nidħol 

fix-xquq xullief fejn il-ħoss ma jidħolx –

Anke lil Amy nixtieq ngħidilha kultant

nobgħod il-kliem qisu uġigħ persistenti.

Il-ġinn tiegħek Tanqueray, tiegħi Anne Sexton.

Ixxommni minn fejn ixxommi nnixxi l-bżieq 

tari bħali bħallikieku kont naf.

M’hemmx tajjeb aħjar minn itjeb.

Jekk (veru) ngħidlek nobgħod dan il-kliem 

nixtieq naf x’jiġri. Meta għedtlek – bqajt xorta

tiekol waħdek fil-kċina fis-sodda fil-bar.

(Naħseb fik kull ukoll mhux biss hemm

Amy u Anne u Stella u Clare u Maria.)

Int dħaqt b’jien miegħi mhux jiena bija 

u nobgħod dal-kliem meta ma jiġix kif irrid

u meta ma jiġix inġebbed il-flokkijiet sa rkuptejja

niġri sa ma niżżewiġx u ma nidħaqx bik

iktar.

/you should be stronger than me/

Darba l-psikjatra staqsietni 

Darba l-psikjatra staqsietni x’qed nagħmel quddiemha.

Lili, il-psikjatra darba staqsietni x’qed nagħmel fuq is-sufan

toqba tagħha, quddiemha, nibki d-dmugħ beraħ bieraħ u 

nomħot fil-flokk. Lilek qatt ma staqsietek tpoġġi hekk.

Poġġietha lili din qisha problema insidjuża qisha mhix.

Poġġithieli f’ħoġri biex bħallikieku nwieġeb –

ili ħafna snin nomħot fil-flokk u ħadd ma qalli xejn.

Kont ili ħafna snin nomħot fil-flokk u ħadd ma qalli xejn

imbagħad ġejt int u jien mort għand psikjatra (mara.

Ftaħtilha sidri, lili, jiena u qaltli fuq is-suppostijiet 

pallidi ta’ dak li ħasbet li jien u li nista’ nkun.

Qaltli nersaq iktar viċin u rsaqt u bdejt nomħot quddiemha. 

Qaltli biex nagħlaq il-parentesi għal li jista’ jkun.)

Qaltli ngħidilha xi nħobb u għedtilha xejn. 

Qaltli rridx kafè – għedtilha le.

Meta għedtilha fuq id-darba li mellistli xagħri

staqsietni qattx kelli ntoppi bil-missier, missieri –

U ħassejtni ftit iktar ikbar meta m’użajtx il-flokk,

seta’ kien x’kien.

Int kellek tkun quddiem il-psikjatra dakinhar

lilek kellha ssaqsi hux kollox sew u li forsi

mhux se jkollok bżonnha iktar.

Qaltli, il-psikjatra lili, biex insib biex ngħaddi l-ħin.

Bqajt qatt m’għedtilha li għandi l-kliem –

/kemm nixtieq/

Kemm nixtieq, Maria, li kont naf inpinġi

dawn il-frammenti miktubin fuq strixxi bojod ħomor

dat-tessut jieħu l-forma ta’ subgħajk

dal-karti trietaq ta’ darba oħra 

daċ-ċfuf żigarelli ta’ ħolm bogħod –

Dan kollu kliem, Maria, ħlief tiegħek.

Għedtlek li nixtieq kont naf inpinġi

inti tpinġi l-kliem u jien niktbu

dan l-ispazju li naqsmu flimkien –

These ekphrastic poems were written in response to a number of Maria Borg’s paintings exhibited collectively as “Touch Me” at Palazzo De La Salle in Valletta during June 2021. They were read for the first time in public during an event at the aforementioned venue on the 11th of June 2021.